♣ مصـــــر : أحلى شــــعر شعبي ... !!! ♣

ـ  نكسة خمسه وعشرين  - 
====================
بقلم الشّـاعر / عادل العش :

جدف وارحل وامشى بعيد
ازهق و ايأس يأس عنيد
سيب الشط وراك مهموم
بلدى مش محتاجه عبيد

ردد ان الحاكم غار
وان خلاص بقى فيه استقرار
واما نقولك عاللى اتبدحوا
قوللى هتكفر بالأعمار ؟

اقنع نفسك باللى حموك
سيب القصر وعيش مملوك
إمشى طريق السهل وسيب
للرجاله طريق الشوك

إفرح بهتافك كام مره
مصرى حره وحسنى بره
إياك تسأل عـ الحريه
ياللى رضيت ببواقى الثوره

مديت إيدى ف قلب الغول
إما يموت أو ابات مقتول
مش راح تفرق لما اخواتى
من بعدى يحكاموا المسؤول

وبلادى تتشرف بيا
كل صباح تعظيم و تحيه
يفتكرونى ويهنونى
إن بلادى حره أبيه

ودمايا غسلت ميادين
ومحدش تاجر بالدين
والأحلام اللى وصلنالها
فاقت حد المتفائلين

والشعب اللى انا مت فداه
سامعه بيهتف لن ننساه
شعبنا واعى وعارف مين
ضده وعارف مى اللى معاه

أنا رافض حب المسموح
أنا رافض اعيشلك مجروح
لو هتروح الروح وتعيشى
قادر اعيشلك من غير روح

أخر ما اتصور يا بلادى
ان الموت ف سياستك عادى
إنى كل ما احبك أكتر
ظلمك يكتر وبتتمادى

أنا داخل حربك بدراعى
وغنايم حربك مش داعى
انا فارس مقتول برصاصه
مستشهد مسموم بأفاعى

وأفاعى ثورتنا ولادى
أنا أسف جدًا يا بلادى
بعد ما قالوا إنى عميل
واستكتروا فيا استشهادى

أنا موتى ف حبك مش حاله
خفت يقولوا مفيش رجاله
أنا مت عشان ادخل جنه
مش علشان اترمى ف زباله

من كتر الدم اللى اتشاف
القاتل مبقاش بيخاف
والخاين مش هو القاتل
الخاين ساكت لو شاف

نصبر ونبص لقدام
عندنا ياما كتير احلام
نصبر كلمه لما قالوها
صبروا فوق التلاتين عام

وكأن العدل بمواعيد
ولا عدينا الألف شهيد
لأ واحتفلوا بعيد الحب
طب حب بلادى مالوش عيد !!

لو عايزين العجله تدور
سيبكم من كشف المستور
العجله هتدوس و تعدى
على واحد واحد بالدور

اللى دمه راح بلاش
لسه أمره مانتهاش
اللى عايش لسه ميت
واللى مات هو اللى عاش
دم اخواتكوا يا مصريين
لو لسه هتفضلوا ساكتين
بكره هتتحول من ثوره
إلى نكسة خمسه وعشرين .