قصيدة الابن الضال

متقولش أنا ضايع بعيد
متكونش قاسي وعنيد
الأبن الضال ليك مثل
اما رجع كان يوم عيد
......
ياللي قولت هات الميراث
من عيشتك زهقت خلاص
وبعيد عنك ليا الخلاص
أنا ماشي لمكان بعيد
......
كنت مش شايف دموعه؟
كنت مش حاسس بجوعه
ليك.؟ وقلبه بين ضلوعه
كان لقلبك مش قريب
......
تهت وأتغربت هناك
وافتكرت لقيت مناك
والفلوس كمان معاك
كل شئ محتاج هجيب؟
......
كوّنت لنفسك صحاب
بعت الدهب عشان التراب
وأتكلت علي السراب
حتي اخوك..سبته وحيد
.......
قلبه قالك متمشيش
وانت قولت عاوز اعيش
ودموعك.مبتكوينيش
انت عن قلبي غريب
......
رحت قولت لقيت مكان
خدعوك بحب وحنان
عند ابوك كان الأمان
وبره بيته مفيش اكيد
......
وأما خلصت الفلوس..
شفت تغيير النفوس!؟
خدت اعظم الدروس ..
إن حبه ليك فريد
......
وأما حسيت بالخيانه
قولت كله ذنبي انا !
دقت كاس ذل ومهانه
دقت نار وعذاب شديد
......
صرت تتذل بدموع
دقت كل مرار وجوع
وتدور وسط الجموع
علي السلام ومافيش سنيد
......
هو حد مسك ايديك
بعد ما رميت اللي ليك؟
كل شئ قدام عينيك
كان تافه.وحش.وبغيض
............
رحت ترعي الخنازير
بعد ما كنت أمير
وبعد ما كنت بتؤمر
بقي كل يوم همك. يزيد
......
حتي أكلك..متلاقيش
ولصراخ الجوع..مفيش
لحظه عنده متساويش
حياتك زي العبيد
.......
بس شافك في دموعك
قلبه حاسس بيك.وجوعك
عنده حل ليه.وقلبه
كان ينادي من بعيد
.......
وأما قولت هجيله تاني
كل شئ من غيره فاني
وعن رجوعي مافيش تواني
هرجع اهتف النشيد
.......
وأما كنت في انتظاره
قبل ما يخلص نهاره
كان واقفلك ويا جاره
كله كان فرحان سعيد
.......
كنت خايف من العقاب؟
ولا تعبان من العتاب ؟
ولا حسيت الغياب
كان ف صدره قيود حديد
.......
وفي حضنه قالك تعالا
مهما كنت أنت في حاله
إني انساك.استحاااااله
مهما كنت انت عنيد
.......
لسه عندي ليك مكان
مهما طال بيك الزمان
لما آن بيك الاوان
تيجي تدخل يا حبيب
.......
قال يلا وادبحوله
وافرحوا النهار بطوله
غنوا يلا وارقصوله
ابني عاش وكان فقيد
.......
وأنت ياللي لسه تايه
من حالك تعبان وكاره
هو بس ايديه بتشفي
هو بس يمد ايد

مشكوره رينه

الرب يبارك حياتك

♱
خاطرة روحانيّـــة في قمّة الجمـال !
تسلمي النا مديرتنــا العزيزة رينــــه
الرب يسوع يبارك تعبكــم لخدمة المنتدى
آميــــــــــن .