ملف اكلات صيامي

تورته صيامى


400ج سكر – 225ج زيت – 250ج ماء دافىء – 75ج كاكاو – 25ج بيكنج بودر

262ج دقيق (حوالى كوب و3 ملاعق كبيره) – نص معلقة ملح – 4ج فانيليا – كريمة نباتى – عين جمل - فروت دراى

الطريقة

مقاس الصينية 28
نولع الفرن على درجة متوسطة قبل الشغل
نضع الزيت والماء الدافىء والسكر وندوبهم مع بعض بالمضرب السلك لحد مايدوبوا ونضع الفانيليا
اضع الملح والبيكنج بودر على الدقيق واخلطهم
ثم اضعهم على الخليط اللى دوبناه فوق واخلطهم ثم اضع الكاكاو ونخلطهم بالمعلقة الخشب او البلاستيك
اضع العجينة فى الصينية فى فرن من 45 دقيقة لساعة
اضع على الكريمة النباتى شوية شيكولاتة سايحة واقلبهم
بعد ماتستوى وتبرد ادهنها من بره ومن فوق والاجناب كلها بالكريمه وندخلها الفريزر لمدة نص ساعه وبعد ماتطلع اصب عليها الشيكولاتة المرواة وهو ساخن جدا
ارش رشة سكر بودرة على العين جمل وارصصه على وش التورتة
وممكن كمبوت فواكه
يعنى الذواق ده على ذوقك
...........................................................................................................


شيكولاتة موروا

½ كيلو سكر – 200ج ماء – 180ج عسل جولكوز – 180ج كاكاو – 20ج جيلاتين نباتى
نضع على النار السكر والماء لحد مايتخنوا بس ميتغيرش لونه
فى حلة تانية اضع الجلوكوز والماء لحد مايتخنوا بس ميتغيرش لونه
ثم اضعهم على بعض ثم اضع الجيلاتين وادوبهم كويس لحد ماتعقد ثم اضع الكاكاو
يغلوا غلوة بس
..........................................................................................................

سلطة الخس والجزر والزيتون


المقادير:
2 ك خس مقطع شرايح
ك جزر مبروش خشن
ك خيار مبروش خشن
1\4 ك نعناع مفروم ناعم
1\2 ك زيتون أسباني أسود شرائح

التتبيلة:
3 م ك زيت زيتون ، 4 م ك عصير ليمون ، م ك سماق ، ملح ، م م نعناع ناشف

الطريقة:
اخلطي المقادير ثم اخلطي مقادير التتبيلة ثم صبيها عليها
...........................................................................................................

شوربة الطماطم

بطاطسايه – بصلة – جزرة – كرات – ملح وفلفل – 20ج كرفس
20 ج ريحان – 10 ج سكر – ½ كيلو طماطم – معلقة طماطم بيورية

الطريقة

نضع البصل والجزر والكرفس المقطعين اى تقطيع فى زيت الزيتون تقليبة ونضع الطماطم المقطعه اى تقطيع ونقلب ثم نضع البطاطساية المقطعه ثم نضع معلقة الطماطم البيورية وماء ونغطى لحد قرب السوى نضع معلقة الطماطم
وبعدين نطفى ونضربها فى الخلاط ونصفيها ونغرفها
..............................................................................................................

جنجر كوكيز



40ج قرفة ( 2 معلقة كبيرة ) – 40 ج جوزة الطيب ( 2 معلقة ) – 400 ج سكر (2 كوب ) - 300 ج ماء ( كوب ونص ) – 900 ج دقيق – 40 ج قرنفل ( 2 معلقة) – 40 ج عصير ليمون - 80 ج عسل نحل ( 1/3 كوب )

الطريقة
اضع فى الخلاط الدقيق والقرنفل وجوزة الطيب
اضع على النار السكر والماء والعسل النحل واول ما يغلوا اضع عصير الليمون
وبعد الغليان انزل بيهم على الدقيق واحدة واحدة
وبعد ما تبقى عجينة ادخلها الثلاجة لمدة ساعه وبعد ماتطلع افردها
على صاج رفيع نص سم واشكلها بالاشكال وادخلها الفرن على 160 لمدة 25 دقيقة
....................................................................................................

بعض افكار للفول




الفول بالزيت و الكمون
:يضاف للفول عصير ليمون و ملح و كمون و زيت(ذرة او زيتون زي ماتحبوا)

الفول بالدقة:تجهز دقة من ثوم مدقوق و ملح و كمون و كركم و ليمون و نضيفها عليه مع زيت و ممكن نضيفله طحينة.

الفول بالسلطة

:تقطع طماطم مكعبات صغيرة و بصل و فلفل أخضر برضه مكعبات صغيرة و نضيف لهم ملح و كمون و خل و ليمون و نضيفهم للفول و نحط زيت و طحينة حسب الرغبة.

الفول بالطماطم:تقطع الطاطم مكعبات صغيرة و لما الفول يسخن نضيفها و نتركها إلى أن تذبل ثم نضيف الليمون و الملح و الكمون و الزيت.

الفول بالثوم و الطماطم:نقطع فصوص الثوم بالسكين شرائح بالعرض و نقلبها في السمن أو الزبدة حتى يصير اللون ذهبي و بعدين نضيف الطماطم المقطعة مكعبات و نضع ملح و فلفل اسود و بهارات و لما الطماطم تذبل نضيف الفول و نقلبه كويس.
الفول بالباذنجان:لو باقي عندك شوية مسقعة أو باذنجان مقلي أو بابا غنوج قلبيه مع الفول و ضيفي ليمون و ملح و كمون و زيت بيبقى طعمه روعة.
...............................................................................................................

فول بالفلفل الاخضر


فول مدمس - نص معلقة صغيرة ثوم مهروس - واحدة فلفل رومى - كوب عصير طماطم - ملح وفلفل وكمون - 2 معلقة زيت

الطريقة

ضعى الزيت على النار وحمرى فيه الثوم لحد ما يصفر ضعى علية عصير الطماطم وخليها على النار لحد ما تتسبك ثم ضعى الفول وشوية مياة صغيرين قطعى الفلفل مكعبات صغيرة وضعية على الفول و تبلى بالملح والكمون يغلو غلوة مع بعض واغرفية
..........................................................................................................
البصارة


المقادير

نص كيلو فول مدشوش
3 حزمة بقدونس_ حزمة كسبرة خضراء
1 بصلة كبيرة او بصلتين متوسطين
1 رأس ثوم ملح، فلفل أسود كمون، نعناع ناشف

للتقلية :
ثوم، كسبرة ناشفة ، عصير ليمونتين ،زيت

الطريقة
نغسل الخضرة كويس و نخرطها بالسكينة
نسلق الفول والبقدونس والكزبرة مع البصل والثوم مع بعض فى ماء حتى يستوي تماماً ويتهري.
وممكن تسوى فى حلة الضغط (البرستو)وممكن لو عازت ماء نضيف لها
نستنى لما تبرد شوية و نضربها فى الخلاط ونرجعها على النار تانى .
نحط لها بقى الملح والفلفل الأسود والكمون والنعناع ونسيبها لحد ماتغلى
نكون عملنا التقلية نضع الزيت على النار حوالى 3 معالق ثم اضع الثوم المهروس لحد ما يصفر ثم اضع الكزبرة الناعمة الناشفة.
بعد ماتجهز خدى منها شوية و حطيها فى البصارة قبل ما تغرفيها فى الاطباق مع تقليبة ثم اضع عصير ليمونة كبيرة او ليمونتين و اطفى النار على طول .
بعد مانغرف البصارة فى الاطباق نضع باقى مقدار التقلية على وش الاطباق
...............................................................................................................

طريقه اخرى للبصاره


يسلق نص كيلو فول مدشوش بس بعد ما يكون منقوع حوالي ساعتين عشان يتسلق بسرعه
.. وبعد كدة يعمل له دقه بملعقه كبيره ثوم مع ملعقه كبيره كمون وشوية شطه وده في الكبه ويوضع ملح بعد الفول ما يستوي ..
ويوضع ملوخيه ناشفه وتكون ناعمه .. حوالي أقل من كوب ..
نرش ونقلب لغاية ما تعطيكي لون حلو للبصاره..
وبعدها نعمل تقليه ببصله كبيره مبشوره أو مقطعه جوانح مع أقل من نص كوب زيت ذره ..
ولما البصله تتحمر بني غامق .. نحط الزيت علي البصاره وأحتفظ بالبصل لتجميل وجه الطبق يبقي كده البصاره خلصت بس لسه عاوزه تتصفي ..

أستني عليها لما تبرد وتخلط في الخلاط وتصفي بمصفاه سلك..
ونرجع نغليها غلوه عشان تضبط القوام بتاعها .. لوكان تقيل نزيد ميه ولو خفيف نغليها شويه .. ونضبط الملح كمان نفرغها في أطباق ونرش علي الوجه البصل المحمر وبقدونس وممكن صنوبر محمر
.............................................................................................................
الطعمية


نص كيلو فول (مدشوش) - بصلة متوسطة مقطعة - معلقة صغيرة ثوم - نص كوب كزبرة خضراء وشبت - ½ كوب كرات
1 معلقة صغيرة كزبرة ناشفة - ½ معلقة صغيرة بيكربونات صودا - معلقة صغيرة ماء ملح- شطة - ربع معلقة كمون مطحون - سمسم للتزيين - زيت للقلي

الطريقة:

يغسل الفول وينقع لمدة 12 ساعة مع تغيير الماء كل ساعتين يشطف الفول جيداً ويصفى من الماء
تخلط الخصروات مع الفول.
ثم تفرم سواء بمفرمة اللحم او الكبة مرتين لحد ما ينعموا خالص
نذوب بيكربونات الصودا في الماء وتضاف إلى العجينة
ثم نضع الملح والشطة و الكزبرة و الكمون وتقلب جيدا يوضع الزيت في مقلاة على نار متوسطة.
نعمل عجينة الطعمية أقراص صغيرة بمعلقتين او بالة الطعمية المخصوصة ونحط وش الطعمياية فى السمسم وتقلى في الزيت لحد ما تستوى وتنشف

ملحوظة
اذا كنتى حتشيليها فى كيس نايلون فى الفريزر ومش حتحمريها يبقى ماتحطيلهاش البيكربونات ( يعنى تحطيها وقت ماتكونى حتحمريها بس )
...............................................................................................................

الطعمية المحشية
بصله مقطعه صغير - ملح - فلفل اسود – كزبره ناشفة - كمون - قرفه ناعمه - فلفلة خضراء حامية



الطريقة

شوحى البصله فى شوية زيت صغيرين وضعى عليها كل التوابل واحشى بيها اقراص عجينه الطعمية وتقلى
...............................................................................................................
ده بقى العدس بطرق كتير ومختلفه

الكشري بالعدس الأصفر




المقادير :
فنجان أرز
2 فنجان عدس أصفر- 3 معالق كبيرة زيت
4 و نص فنجان ماء _ ملح _بصلة كبيرة

الطريقة :

يغسل الارز جيدا ويحمر الأرز في الزيت قليلا و بعدين تشيلية من الزيت في الزيت المتخلف من تحمير الأرز يحمر العدس قليلا بنفس الطريقة و بعدين تشيلية برضة من الزيت حطى الماء على الزيت اللى حمرنا فية و الملح ويترك حتى يغلي لمدة خمس دقائق اخلطى الأرز مع العدس ثم يضاف على الماء المغلي ويطهى على نار هادئة بنفس طريقة الارز العادية في معلقة ز يت كبيرةحمر ى البصلة لحد ما تحمر و بعد ما يكون العدس بالارز استوى حطى الزيت اللى حمرنا فية البصلة عليهم يغرف في طبق و يجمل الوجه بالبصل المحمر .
............................................................................................................
الكشرى المصرى

المقادير
1 كوب عدس بجبة ( عدس اسود)_2 كوب أرزاو كوب عدس بجبة _كوب ارز او 2كوب عدس بجبة _ كوب ارز كيس مكرونة صغيرة ( مرمرية ) - نصف كوب حمص الشام- 4 بصلة كبيرة

الصلصة
2 كوب عصير طماطم
1 ملعقة صلصة طماطم
5 فصوص ثوم مدقوقين
ربع كوب خل و ملح و كمون و شطة زيت ذرة

الطريقة:
- نغسل العدس ثم نسلقة فى ماء وملح وكمون نص سلق بس ) لانة حيكمل السوى مع الارز)و بعد السلق نشيلة من ماء سلقه و نحتفظ بالماء–(حيكون لونها بنى )نقطع البصل أربع إرباع ثم شرايح رقيقة جدا ونحمره فى زيت حتى يصبح لونه ذهبي مائل للاحمراراو ممكن نقول بنى بس ما تحرقيهاش. - نشيل البصل من الزيت بالكبشة ونحطة على الورق الماص للدهون او على كلينكس
- في نفس الزيت نضع العدس المسلوق ونقلبه تقليبة ثم نضع الماء بتاعة اللى لونه بنى و كنا ركناه على جنب و نضع الملح و نتركها تغلي ثم نضيف الأرز بعد غسله و يجب أن يغطي الماء الأرز و العدس , نقلبهم جيداً و نغطي الحلة , وعندما يبدأ الرز بشرب الماء نوطي النار و نطبخه مثل الارز العادي.
- نسلق الحمصفي ماء مملح وكمون نصفيه من الماء ) ممكن الاستغناء عن الحمص )
- نسلق المكرونة في ماء مملح و نصفيها .

- لتحضير الصلصة :
ناخد الثوم المدقوق و نقلبه في القليل من الزيت إلى أن يصفر لونه ثم نضع الخل لحد ما يغلى و بعدين نضيف عصيرالطماطم و الملح و الكمون و الشطة لحد ماتتسبك مع اضافة القليل من الماءحتى تكون متوسطة السمك ولا جفيفة ولا تخينة
- و نطفي عليها النار . .
ترتيب الطبق:
- نضع الكشري )الأرز بالعدس)و عليةالمكرونة و علية صلصة ثم البصل المحمر ثم الحمص و يقدم و الدقة بتكون وحدها
...............................................................................................................

شوربة العدس

ربع كيلو عدس اصفر - ملح – فلفل – كمون – بصلة متوسطة مخرطة رفيع – طماطماية – بطاطساية صغيرة – جزرة صغيرة - شطة حسب الرغبة

الطريقة

نضع العدس فى حلة على النار و علية الطماطماية مقطعة اربع و الجزرة مقشرة و مقطعة قطع صغيرة و البطاطساية مقشرة و مقطعة نصين ونضع الماء يغطى العدس بكوب ماء و نتركة لحد ما يستوى مع التقليب و نشيل الريم و نراقب الماء كل ما ينقص نزود شوية بشوية بعد ما يستوى اما نضعة فى الخلاط فى دورق العصير و نضربة ( او ) نصفية بمصفة الطماطم ام ايد )وانا بفضل المصفاةثم نضع شوربة العدس فى الحلة و نبدأ فى وضع الملح و الفلفل و الكمون بس زودى الكمون شوية بيديها طعم جميل وقلبى و ظبطى تخانة العدس زى ما انتى شايفة امامك يعنى لو تخينة زودى ماء و قلبى هاتى معلقتين زيت و عليهم البصلة المبشورة لحد ما تصفر وحطيها على العدس تقليبة و اطفى النار
..............................................................................................................

العدس الاصفر المغروف


بعد ما عملنا شوربة العدس عادى خالص وبنوصل للمرحلة اللى بنحط تقلية البصل فى العدس بنخفف الشوربة شوية وبنغسل حوالى نص كوباية ارز وبنضعها على العدس واهم حاجة تفضلى تقلبى علشان الارز مايلزقش لحد الارز مايستوى وتغرفية فى الاطباق زى الارز باللبن بالضبط وتضعى نص البصلة التانية على الوش


كشرى العدس الاصفر


كوب عدس اصفر
كوب ارز- زيت - ملح - كمون

الطريقة

اغسلى الرز لوحدة واغسلى العدس الاصفر لوحدةضعى فى حلة على النار حوالى 3 معالق زيت وحطى الارز فى الزيت وقلبى قلبى لحد ما تحسى ان الارز اتبل كلة بالزيت وفرفرضعى العدس على الارز والملح والكمون واخلطيهم ببعض وبعدين حطى عليهم ماء كأنك بتسوى الارز عادى خالص ولما يشرب الماء تروحى موطية النار تسبية لحد لما يستوى وتغرفية وبيكون الكشرى مفرفر وبالهنا والشفا بيتاكل معاة طرشى زى الليمون بيبقى جميل

ملحوظة
بالنسبة للعدس الكشرى ممكن يتعمل مش مفرفر بيكون طرى (سوفت )فية ناس كتير بتحبة كدة بعد ما يشرب الماء ونوطى النار اثناء ما هو بيستوى ترشرشى كل شوية بشوية ماءحتلاقية بيطرى ولما يستوى قبل ما تطفى النار على طول تروحى حطة علية معلقة زيت و تقلبيها وتطفى النار وتغرفية

..............................................................................................................

طاجن عدس اسود (بجبة )


نص كيلو عدس اسود - كوب بصل - راس ثوم مهروس - كيلو طماطم - كوب فلفل اخضر مقطع صغير - ربع كوب خل - ملح – فلفل – شطة - زيت

الطريقة

انقعى العدس حوالى3 ساعات اسلقى العدس فى ماء مغلى لحد ما يستوى نص سوا ثم صفية من الماءنحمر البصل والثوم لحد ما يصفروا ثم نضع الخل ثم الفلفل الاخضر وقلبيه 5 دقائق ثم نضيف الطماطم المقطعة قطع صغيرة ونترك الخليط على النار لحد ما يتسبك نضع كوب ماء و الملح والفلفل والشطةونخليهم لحد مايغلوا ثم نضيف لهم العدس تقليبتين لحد ما يغلىنضع المقدار كله فى طاجن وندخله الفرن حوالى ربع ساعة

..............................................................................................................

سلطة عدس بجبة


2 كوب عدس اسود مسلوق
- 4 فصوص ثوم مهروسين
- 2 عصير ليمونة كبار
ملح - زيت زيتون

الطريقه
اسلقى العدس عادى وصفية من الماء بتاعه وبعدين قشرى الثوم واهرسيه مع الملح ثم ضعى عليه عصير الليمون وبعدين ضعى الثوم بالملح بعصير الليمون بعد ما تخلطيهم على العدس وتروحى خلطاهم كويس بالمعلقة مع معلقة زيت زيتون وتضعيهم فى الطبق و ترشى على الوش كمان معلقة زيت
على فكرة جربى حطى معاهم بصلة خضراء مفرومة بتدى طعم جميل وممكن رشة شطة صغيرة للى بيحب الشطة

.............................................................................................................
صينية العدس بالصلصة


كوب عدس اسود - كوب عصير طماطم - كوب بصل - نص راس ثوم - زيت - ملح وفلفل وكمون - ربع كوب خل - نص حزمة بقدونس مخرط

الطريقة

اغسلى العدس من الصبح وانقعية لحد ميعاد الغداء .اسلقى العدس فى ماء مغلى نص سوى بس .نقدح الزيت فى مقلاية ونحمر فيه البصل لحد مايصفر ثم نضع الثوم المهروس ونحمرهم سوا وبعدين نضع الخل وعصير الطماطم ونتركهم يتسبكوا )زى صلصة الكشرى ( نضع العدس والبقدونس على الصلصة ونخلطهم وبعدين نضعهم. فى طبق فرن ونتبلهم وشوية ماء وندخلهم الفرن لحد ما الصينية تستوى ويتاكل على طول وهو سخن

...............................................................................................................

صينية العدس فى الفرن


كوب عدس اصفر - نص كوب بصل - 5 فصوص ثوم مهروسين - نص كوب بقدونس - نص كيلو طماطم - فلفلة رومى كبيرة مقطعة مكعبات صغيرة - زيت - ملح وفلفل وكمون - كزبرة ناشفة

الطريقة
نعمل العدس شوربة عادية زى اللى كتبناها قبل كدة بس بعد ماتصفية متزوديش علية ماء سيبية تخين زى ماهو نقدح الزيت فى مقلاية ونحمر فيه البصل لحد مايصفر ثم نضع الثوم المهروس ونحمرهم سوا وبعدين نضع عصير الطماطم ونتركهم يتسبكوا .نتبلها بالملح والفلفل والكمون والكزبرة وبعدين نضع الفلفل الاخضر والبقدونس ونقلب كله مع بعض ثم نضع العدس ونقلب كله مع بعض ونظبط الحدق. نصب الخليط فى طبق فرن وندخله فرن متوسط الحرارة
..............................................................................................................
محشى الكرنب

3بصلات كبار حزمة شبت، و 2حزمة بقدونس3معالق كبار و مليانين صلصة طماطم كيلو رزكرنبة متوسطةملح _ فلفل _ كمون - 3معالق زيت الطريقة:
تغلي ماء على النار و تحطى فية شوية كمون وتطلعى ورق الكرنب من الكرنبة بانك تقطعية من عند الراس بالسكينة وتحطية فى الماء المغلى يا دوب ثوانى و تطلعية فى المصفاة. بعد كدة تقطعية حسب المقاس اللى انتى عايزاة طريقة عمل الخلطة:
تفرمى البصلة بالسكبنة وتحطى عليها شوية ملح و تفضلى بايدك تدعكيها كويس كانك بتعصريها بين كف ايدك حتلاحظى انها طريت و نزلت شويه سائل وهو المطلوب .بعد تنقية الخضرة طبعا و غسلها كويس تخرطيها بالسكبنة على البصل و تحطى كل التوابل والزيت والطماطم و اخيرا تجيبى الرز وتغسلية وتصفية كويس وتحطية على الخلطة و تخلطى كله كله كويس وتحشى ورق الكرنب ورقة ورقة ومش كتير علشان ما ينفش. ضعى فى قعر الحلة قبل وضع المحشى شرائح طماطم تخينة تغطى بيها القعر كلة علشان المحشى اللى تحت ما يتحرقش. اغلى ماء فى حلة (ممكن مكعب خضروات) و فيها معلقة زيت علشان المعلقة دى هى اللى بتدى صابع الكرنب لمعة من برة .ضعى شوربة المكعب على الكرنب بحيث يا دوب تكون عند الصف الاول وتحطية على النار و تهزى الحلة و تسبية يادوب يغلى ويشرب الشوربة تروحى موطية النار خالص زى الشمعة لحد ما يستوى بانك تطلعى صباع و تدوقية و ممكن عند التقديم تقلبى الحلة زى ما هيا فى سرفيس فحتلاقى شكل الطبق من فوق مرصص بحلقات الطماطم شكله حلو ملحوظة اذا كانت الكرنبة صغيرة ممكن تفككيها بالسكينه كويس من فوق و تحطيها زى ما هيا فى الحلة حتلاحظى ان الورقة اللى حتكون جاهزة سابت الكرنبة لوحدها و بعدت عنها دة معناه انها خلصت و هكذا

,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,
طريقة المحشى المتنوع


(خفيف وينفع دايت)كيلو بزنجان وفلفل رومى وكوسةاو كرنب او ورق عنب
2 كوب ارزحزمة شبتحزمة بقدونسنص حزمة كسبرة خضراءطماطم معصورة طازجةطمطماية مخرطة صغيرملح وفلفل كمون فى محشى الكرنبمعلقة زيت زرة وممكن الاستغناء عنهاالطريقة تقورى البزنجان والكوسة بالطريقة المعروفة .تشيلى الكاس الاخضر والبزور من الفلفل او تسلقى الكرنب وتقطعى الورق او تسلقى الورق العنب .تجهزى الحشو الارز على الشبت والبقدونس والكسبرة المغسولة والمخرطة على متوسط والملح والفلفل والطماطماية المخرطة وعصير الطماطم ومعلقة الزيت تخلطى كله وتحشى بية المحشى وترصصية فى الحلة وتسقية بالشوربة (طبعا ماء مغلى مضاف ليه مكعب خضروات) ويمكن الاستغناء عنه ونعمل بماء فقط

...........................................................................................................


الملوخية

كيس ملوخية اونص كيلو ملوخية مخرطةشوربة ( ماء +مكعب خضروات )نص راس ثوم صغيرةملح معلقة كبيرة كزبرة ناشفةالطريقةنضع من كوب لكوبين شوربة على النار لحد ماتغلى ثم نضع الملوخية فى الشوربة بالطريقة العادية ونحضر مقلاية تيفال ونضع فيها الثوم المهروس بدون اى دهون والكزبرة الناشفة ونقلبهم لحد ماتلاقى ريحة الكزبرة طلعت تروحى جايبة كبشة من الملوخية و حطاها على التقلية وتكبيهم تانى على الملوخية وتفلبى تقليبة وتطفى (ممكن تضعى 1م زيت زيتون او اى نوع ترغبيه)


...............................................................................................................

باذنجان و فلفل مقلي بالخل و الثوم المقادير:
نص كيلو بزنجان اسود مكبب – نص كيلو فلفل رومى – راس ثوم مهروسة – ربع كوب خل- 2قرن فلفل حامى -4طماطم مقطعة متوسط - ملح – فلفل – كمون زيت للقلىالطريقةقشرى البذنجان ثم قطعية شرايح متوسطه ثم نضعه فى مصفاه ونرش عليه ملح ويترك)علشان ما يشربش زيت كتير ( وبعدين نقلية فى الزيت لحد ما يبقى بنى فاتح .ونشيله فى المصفاة علشان ينزل كل الزيت الزيادةنقلي الفلفل الاخضر فى نفس الزيت مكان البزنجان لحد ما يتقلى ونشيله من الزيت ويوضع في مصفاه في مقلاية تانية نضع قليل جدا من الزيت اللى حمرنا فية البزنجان والفلفل ونحمر فيها الثوم لحد ما يصفر. وبعدين ضعي الفلفل الحامى المخرط صغير والخل ثم ضعى الطماطم عليهم والملح والفلفل و الكمون وقلبى وسيبيهم لحد ما الطماطم تدبل ضعى البزنجان والفلفل في طبق غويط على طبقات يعنى نحط بزنجان وبعدين فلفل وهكذا .ثم صبي عليهم خليط الثوم والطماطم ونغزيهم بالشوكة علشان الخليط ينزل جواهم والطبق يتشرب من الصلصةو يتاكل ساخن او بارد


.............................................................................................................

البزنجان المخلل

المقاديركيلو بزنجان عروس ) بتاع الحشو ( رفيع و صغيرراس ثوم
2 فلفلة مهروسين
2 فلفلة حاميين كوب خل معلقة كبيرة ملح كوب ونص ماءالطريقةنشيل الكاس الاخضر اللى فى البزنجانة يغلى الباذنجان في ماء مملح لمدة ( 10-15 ) دقيقة أو حتى يطرى يشق الباذنجان بالطول شقا عميقاً من فوق لتحت بالسكينة ثم يوضع في مصفاة ويترك ليبرديفرم الثوم والفلفل و الفلفل الحار والبقدونس في الكبة حتى يكون مزيج ناعميحشى الباذنجان بالمعلقة الصغيرة من الخليط اللى عملناة ثم يوضع في طبق زجاج او بلا ستيك على ان يكون الحشو لفوق وبعدين نحط الخل.
دوبى الملح في الماء وبعدين حطيه على الباذنجان ويغطى الطبق او العلبة كويس جدا و يفضل لو سبتية يوم علشان يشرب من بعضة و يبقى حلو
..............................................................................................................

سلطة الباذنجان

سلطة سهلة ولذيذة ...وتنفع مع الرز او مع الخبز..او لحالها

..
مقاديرها..
+ باذنجان مكعبات مقلي..
+ خبر مكعبات مقلي..
+ ثوم+عصير ليمونه+ملح+سماق
+ بقدونس مفروم...


نخلط الباذنجان مع البقدونس المفروم ثم نسكب عليه الثوم والليمون ونحركة مع بعض

..
..ثم نتبله بالملح والسماق..ونضع الخبز المقلي على الاعلى..ونرش البقدونس للزينة
,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,,

سلطة الجرجير بالرمان




المقادير:
4 ك جرجير "مقصوص العرق فقط"
1 ك حبات الرمان

التتبيلة:
1 م م قرفه ، 1 م م فلفل أسود ، ملح ، 1 م م بابريكا ، 1\4 ك دبس الرمان ، 1\4 ك ليمون ، 1\4 ك زيت زيتون

الطريقة:
تخلط التتبيلة في وعاء بروحها ونصبها على الجرجير "وإذا ضفتي الرمان اخلطيها بس حاولي تخلينها باينه ، وشوفي الألوان والطعم" قبل التقديم ب10 دقايق أو أقل عشان ما يذبل وتقدم
.........................................................................................................
سلطه بابا غنوج

:
==========
المقادير:
=======
ربع كيلو باذنجان أسود كبير
نصف كوب طحينه و بقدونس مفرى
ثلاثه ملاعق زيت
أربعه ملاعق كبيره من الخل
ثلاثه فصوص ثوم و ملح وكمون و شطه حسب الرغبه
الطريقة:
=======
يشوى البذنجان و يدق ناعما
يدق الثوم مع الملح و الكمون و يضاف إلى الطحينه و يقلب
يضاف الباذنجان و قليل من الشطه و يقلب جيدا و يزين بالبقدونس


للى بيحب سلطة بابا غنوج ممكن تشوى الباذنجان كمية يعنى كيلو او اكتر بدل ما تشوى واحدة او اتنين كل مرة


وبعدين تقشرى كل الباذنجان بعد ما يطلع من الفرن ويبرد طبعا
وتقسميه وجبات يعنى مثلا لو كان حجمه كبير يبقى كل واحدة لوحدها فى كيس بعد ما تتقشر وتتحط فى الفريزر
وبعد كده لو عاوزة تعملى بابا غنوج والباذنجان مش متوفر فى السوق ممكن تطلعى من الفريزر
وتعملى عليها باقى مكونات سلطة البابا غنوج الطحينة والليمون وكل الباقى وكانك لسه عاملاه طازة
وعلى فكرة لما بيتحفظ فى الفريزر الباذنجان فقط بدون اى حاجة عليه بتكون نتيجته احسن كتيييييييييييير من انه يتحفظ بابا غنوج جاهز

..............................................................................................................

بطاطس محشية

خرشوف محشى

1 بزنجان رومى – فلفل الوان – كوسة – طماطم – جزر – بطاطس متوسطة الحجم – كيس خرشوف او خرشوف فريش مسلوق
الطريقة
نقشر البطاطس ونقورها ونقطع حتة صغيرة من اسفلها علشان تقعد فى الصينية
ونضعها فى ماء وملح على مانخلص الحشو علشان متسودش
نضع الزيت على النار ونشوح فيه م ك بصل وم ص ثوم مفروم وفلفل ملون مكعبات صغيرة وبزنجان مكعبات صغيرة والكوسة مكعبات صغيرة وعود روزمارى وعود كرفس مقطعين ونشوح كله لمدة 5 دقائق ادهن صينية بالزيت ونحشى البطاطس ونرصصه فى الصينية ونضع على وش كل بطاطسايه طماطماية صغيرة قوى او مكعبه طماطم ونحشى الخرشوف ونضعه فى الصينية وندخلهم الفرن
...............................................................................................................
فول اخضر بالكسيرة
2 م بصل مفروم – 3 م كسبرة خضراء – م بصل – 1/2 ك فول اخضر بقشره – زيت – 2 كوب شوربة او ماء – م كبيرة ارز مغسول
الطريقة
نقطع الفول بالورب قطع صغيرة
نشوح البصل فى الزيت ثانية ثم نضع الفول لحد ما يدبلوا شوية ثم نضع م الارز ونقلب كويس ثم نضع م الكسبرة الخضراء المفرومة ونقلب ثم نضع الماء او الشوربة لحد ماتغطى المقدار ونتركه لحد ما يبتدى يدخل فى السوى نعمل التقليه نضع زيت فى مقلاية ونشوح فيها الثوم والكسبرة الخضراء ثم نضعهم فى الحلة على الفول لحد مالتغلى غلوة صغيرة ونطفى ونغرفها
..............................................................................................................
ارز بسمتى بالحضروات الهندية




2 كوب ارز بسمتى – 3 م زيت زره – كوسة – جزر – 1/8 ك بسلة – فاصوليا – 3 كوب ماء ساخن – بصلة – 2 فص حبهان – 3 قرنفل
الطريقة
نضع الزيت فى الحلة وعليها بصلة مخرطه ونشوحها ثم نضع الخضار المشكل المقطع والحبهان والقرنفل يتشوحوا ثم اضع الارز ونقلب كله مع بعض كويس ثم نضع الماء ونتركه يستوى عادى

.............................................................................................................
بطاطس بالكسبرة والثوم



3 بطاطس كبيرة – م ثوم مفروم – م كسبرة خضراء مفرومة
نقشر الطاطس ونقطعها مكعبات ونشوحها فى الزيت
نشوح الثوم فى الزيت ونضع الكسبرة الخضراء المخرطة وعصير ليمون ونقلبهم ثم نضع البطاطس ونقلبهم كلهم مع بعض كويس ونغرفهم

..........................................................................................................

مكرونة بالطماطم



1/2 ك مكرونة اسبجتى او اى نوع – م ريحان – م بصل – 3 طماطم – زيت زيتون – 1/4 ك زيتون اسود – زعتر
الطريقة
نسلق المكرونة عادى ونصفيها من الماء
نشوح البصل فى الزيت والثوم والفلفل الملون والحامى والزعتر الفريش يا دوب ثوانى
ثم نضع الزيتون وفى الاخر نضع الريحان والمكرونة ونقلبهم كلهم مع بعض
ونغرفها
..............................................................................................................

ارز بالشبت والفول الاخضر



1/2 ك ارز بسمتى – 1/2 كوب شبت – 1 ونص كوب فول اخضر مفصص
زيت – ملح
الطريقة
نضع فى قاع الحلة طبقة ارز ثم نضع طيقة فول اخضر ثم نضع طبقة شبت ثم طبقة ارز ثم نضع طيقة فول اخضر ثم نضع طبقة شبت ثم طبقة ارز ثم نعمل فى منتصف الارز بأيد المعلقة الخشب 5 خروم ونضع داخل كل خرم زيت شويه صغيرين ثم نضع ماء يادوب يغطى الارز ونغطيه ونتركه يستوى حوالى 5 دقايق

حلو الملف ده يا رينا
ثانك يو

يثبت مع تقييم

وصفات روعة يا رنيه
ميرسي كتير

الظاهر لم تراه صاحبة الموضوع

ميرسي كتير لموضوعك
ربنا معك

العضو 'ERRINA_girl' قام بالعملية التالية: رمي الزهررررر

'ارمي الزهر يلا' :

النتائج : 18

بحب الاكلات دى
ميرسى رينيه

تمام كلهم وقتهم الايام دى
ميرسى ربنا يباركك

جميل الملف رينا ربنا يبارك حياتك

ميرسى كتير لمروركم المميز يا اجمل اعضاء

ربنا يتمجد فى حياتكم