ترنيمه ماتدمَّعُوش ..

ماتدمَّعُوش ...
إحنا فى إيدُه ماتخافوش
كل الدِّيابَه يجَرَّبُوا
ياخدونا مِنُّه مايِقدَرُوش

ماتدَمَّعُوش ...
تِتلَم حوالينا الوحوش
وبكِلمَه مِنُّه هَيِهرَبوا
ده عَنِّنا دايماً يحوش

__________

لو مَرَّه عدِّينا فـ آتون
هيجيلنا ويطَفِّيه
نِدخل فـ جُب أسود
نشوفه قاعِد فيه
يِظهَر قُصادنا هَم . عادى ... نِندَهُه يخفيه
مين إللى صَلَّى لُه بإيمان
وهوَّ ماسمِعلُوش !

***
القلب لو يِتعَب مفيش
غير المسيح يعافيه
ويندَهُه المَديون
مِن الديون يعفيه
القلب يملاه بَرد . نادى ... على حُبُّه هَيدَفيه
ويعنى مين خَبَّط له باب
وهو مافتحلوش!