ازاى تقابلى عريس اول مرة _ _

ازاى تقابلى عريس اول مرة _
_
_
_
الموضوع ده مش تزيين عروسه ولا حاجه
بس هو بردو عن حاجه مهمه اوى للعروسه
وهو ازاى تقابل عريسها لاول مره
وتعمل ايه
وتتكلم ازاى
وتتكلم اصلاا ولا لا
بس قلت لازم تقروه يا بنات
يمكن يفيدكم

الخطوة الأولى
جهزي نفسك نفسيا ومظهريا

1-
علشان ماتتعبيش نفسك وأعصابك على الفاضي ياريت تشيلي من دماغك فكرة إنك
بضاعة جاي العريس يتفرج عليها لأن دي حاجة مش صح وحطي في دماغك إن ده جاي
يتعرف على البنت اللي ممكن تكون شريكة حياته وإن دي حاجة مش عيب ومفيش منها
أي تقليل من شأنك

2-
حاولي على قد ما تقدري تخلّي أعصابك
هادية جدا وتبعدي عن أي مصدر قلق أو توتر.. علشان التوتر ممكن يبان على وشك
واحنا مش عايزين كده احنا عايزين عروسة زي القمر

3-
بعد كده
ادخلي الأوضة عندك وابدأي في اختيار لبسك.. وعلى فكرة النقطة دي بتحير
بنات كتيييير أووووي لأنهم بيحتاورا يلبسوا كلاسيك ولا لبس عادي
بس
بيني وبينك ياريت أول مرة دي تلبسي لبسك العادي اللي انتي بتلبسيه وأنت
خارجة.. يعني لو كنت بتلبسي بنطلون وبلوزة البسيهم بس ياريت البنطلون يكون
قماش مش جينز أو لو كنت بتلبسي جوب وبلوزة البسيهم برضه وده علشان يشوفك
على طبيعتك في اللبس وبلاش موضوع إنك تلبسي بدلة لأن دي هتخلي الحكاية تبقى
رسمي أوووي وممكن تبيّنك أكبر من سنك ( فى وجهات نظر اخرى بتقول ان مهم
انك تكونى بتلبسى جوب وبلوزة وكعب عالى )
واوعي تنسي تختاري الألوان اللي تكون مناسبة عليك وتنور وشك

4-
لو كان اللقاء ده هيتم في البيت فياريت ما تلبسيش كعب عالى قوووووووووووى

5-
ياريت في اليوم ده ما تكتريش في المكياج علشان ما تبقيش عاملة زي
البلياتشو.. وخليك بسيطة جدا في مكياجك يعني كفاية أووي إنك تحطي روج
وترسمي عينيك بالكحل والآي شادو وتحطي ماسكرا وبلاش أحمر خدود لأن طبيعي
جدا إن وشك هيحمر في اليوم ده فمش هتحتاجي لأحمر الخدود لأنه هيكون موجود
طبيعي

6-
خليكي متفائلة وتوقعي الخير علشان تلاقيه خير وتوكلي على الله وفوضي أمرك إليه، وادعي ربنا يوفقك في اللي فيه خير ليكي
أعتقد إنك لو عملتي الحاجات اللي قلنا عليها دي هتكوني فعلا استعديت للقاء ده وتعالي نشوف اللي المفروض تعمليه أثناء اللقاء ده
*******

الخطوة التانية
أثناء اللقاء نفسه
1-
بلاش تشيلي صينية عصير في إيدك وأنت داخلة لأنك ممكن ترتبكي وتوقعيها على
اللي قاعدين.. كفاية قووي إنك تدخلي بابتسامة بسيطة على شفايفك وتسلمي على
كل اللي موجودين وعليه هو كمان.. واقعدي وخليك شاطرة واختاري إنك تقعدي في
الكرسي اللي يكون مواجه له علشان تقدري تشوفيه كويس لأن ده حقك وخليكي
واثقة من نفسك وخدي الموضوع ببساطة علشان يعدّي

2-
لو مامته
جات معاه ياريت تخلّي بالك منها وبلاش تكشّري في وشها وهي قاعدة.. خليكي
مبتسمة ليها دايما حتى لو قالت حاجة مش عجباك اوعي تردي عليها رد مش مناسب
وكلميها عادي وحاولي تكسبي رضاها وخليكي ذكية وفكري في كل كلمة قبل
ماتقوليها

3-
وأنت قاعدة اتكلمي براحتك من غير تكلف وافتحي مجالات للكلام واسمعيه كويس وهو بيتكلم علشان تقدري تحكمي عليه

4-
لو فيه حاجة تضحك يا ريت ماتضحكيش ضحك بصوت عالي أو ضحك هيستري كفاية قوووي ابتسامة بسيطة

5-
خليكي جريئة ولو وجه لك الكلام ردي عليه بذوق من غير كسوف
*******
كمان خدي بالك أوووي
1-
لو سمحت الظروف وقعدتوا مع بعض ياريت تتكلمي معاه في أمور عادية جدا.. زي
مثلا البرامج اللي بتعجبك أو عن حاجة تكون حصلت قريب وشدت انتباهك وابعدي
عن الكلام في أي مواضيع تكون مسار جدل زي مثلا الكرة والأهلي والزمالك..
ولو تطور الكلام بينكم لأي مواضيع فيها جدل خليكي ذكية وبلاش يكون عندك
تحيز في الرأي واسمعي منه وابدي رأيك بأسلوب لطيف من غير ما تحرجي نفسك أو
تحرجيه

واوعي في أول كلام بينكم تسأليه أي أسئلة شخصية أو أسئلة
محرجة زي مثلا إنك تسأليه إذا كان خاطب قبل كده ولا لأ أو مثلا مرتبه كام؟؟
لأن الأسئلة اللي من النوع ده ما ينفعش تسأليها في أول مقابلة

2-
لو كان اللقاء في مكان عام زي النادي مثلا أو كافيه أو خلال مناسبة ما
فحاولي تقللي من نظراتك حول الأشخاص الموجودين في المكان وركزي في الشخص
نفسه

*******
الخطوة الثالثة
بعد انتهاء اللقاء
بعد
ما يمشوا عايزاكي تقعدي مع مامتك وتحكي لها على اللي حصل وتفكري معاها كويس
وشوفي إيه اللي قدرتي تطلعي بيه من اللقاء ده.. لأن فيه حاجات حتى لو
بسيطة هتكون بانت قدامك ولو مش قادرة تحكمي كويس ياريت تطلبي لقاء تاني
علشان تقدري تحكمي على أساس صح.. وربنا يوفقك

بجد تقييم كبيييييييييييييييير
للموضوع الراااااائع دا
ربنا يباركك

ممممممممممم
مع ان النصايح دهي حلوه بس لو انا مش هعملها ديما بلاها اول مره
يعني يكون نوع من النفاق لو عملت ده بدون اقتناع بانه الصح
وخصوصا نقطه مامته دي

روعه يا جميله
جد موضوع يستاهل تقيم كبير
ميرسى ليكى

قريته قبل كده بس قريته تانى ههههههه

لانه بجد حلو اوى اوى

ميرسى يا سكره

جميل موضوعك كيرمينا


الرب يبارك مجهودك