ألّف دستور معتّق

ألّف دستور معتّق

إكتب على مقاسك..

ظبطه على طولك وعرضك

إتشاور وإكتب ونسق

ده اللى زيّك ما صدق

بس وانت بتكتب..وبتألف وبتظبط...دقق

دقق لتنسى واحد فقير

واقع فى عرضك

دقق لتنسى واحد شهير

فاقع مرارتك
دقق لتنسى عيال احرار
فاقوا لشطارتك
دقق لتنسى حد مصرى
مانتماش لجيرتك
دقق لتطبق شرعك مش شرع الرحمن
فتضيع دنيا وآخره والفاعل سوادك

حتكتب للى شبهك ولا حتكتب لخلق الله؟
حتكتب للى زيّك ولا فاهم فى الاختلاف حكمته المُهداه؟
حترحم الحرية واللى حقق بداية
ولا حتوئد حي ما تمناه فى النهاية

حتكون صورة تانية من ديكتاتور طمعان
صورة بتمنّى الغلبان وبتنهش بسلطان
سلطان وعد بدنيا وبآخرة وكأنه فى ضمان
سلطان اتكلم حياة كاملة
ووقت الجد هان وإستهان

تصدق..مش خايفة منك قد ما خايفة عليهم
اللى مبيسمعوش الرحمة المباشرة من اللى خلقهم بتناديهم
اللى مبيسمعوش غير شيوخ ملت دماغهم ولمّت بصمات ايديهم
اللى معرفوش حنّية غير كسوة سلف ولحمة إخوان
اللى اتنسوا من حملة الصولجان وموعيوش الا على درس الامام

كان نفسى يعرفوا الحق من الحق
مش من ساكنى البرلمان
كان نفسى يدوقوا طعم الصدق
مش تخويف اللجان
كان نفسى يتعرفوا على الرقة
فى قلوب عباد لعباد

عباد مخلوقين مرزقين مش مهم ايه اسمهم وازاى إتباعهم وإيه الدين..
عباد عايشين..مش حيقتلهم التغريب..مش حينهشهم الإقصاء..
مش حيضرهم عنصرى رافض ولا متشدد على الآخرين
مش حيضرهم آمر للجميع لكن لنفسه فى الخباثة مرن
ده الرزق والسعادة والجنة والفلاح..مش من عباد...
والحياة واللى فيها والموت وما آل..له وحدة ذو القوة رب العالمين!

للكاتبة رشا ابو السود

كلام سليم بس اللجنه دي مش هتحط دستور يخدم حد غيرها
هيخدم سلف واخوان بس
يا ريتهم يسمعوا ويعملوا بالكلام ده يا باش مهندس

رائعه شنوده ياريت يسمعوا الكلام ده حيبقى احلى دستور

better off maro كتب:: كلام سليم بس اللجنه دي مش هتحط دستور يخدم حد غيرها
هيخدم سلف واخوان بس
يا ريتهم يسمعوا ويعملوا بالكلام ده يا باش مهندس

ميرسي يامارو علي مرورك العطر ونورتي الموضوع

واتمني من كل قلبي ان هما يراعوا ضميرهم ويراعوا مصلحة البلد لا مصالحهم الشخصية

وربنا يمد ايدة ويتمجد ف الموضوع

COLETTE2012 كتب:: رائعه شنوده ياريت يسمعوا الكلام ده حيبقى احلى دستور

ميرسي ياقمر نورتي الموضوع

وربنا موجود