قصة بعنوان [[ من بكره مفيش اله ]]

[ندعوك للتسجيل في المنتدى أو التعريف بنفسك لمعاينة هذه الصورة]

ازيك...عامل اية....تمام ولا مش تمام....تحب اقولك على حاجة جديدة اخر حاجة....من بكرة فركش... ربنا مش هيبقى ربنا...جت فى دماغك مليون فكرة....او مليون كلمة عاوز تخبطنى بيها...اوعى تكون نزلت فى المربع بتاع الكومنتات عشان تقولى انى مهرطق وانى كذا وانى كذا وانى كذا...هقولك على حلم فى خيالى...وفى النهاية ليك حق تحكم عليا باللى انتا عاوزه خصوصا لو انتا انسان بار مش خاطى زى...

قولنا خيالية.....عشان متفكرش كتير وعشان مش عاوز اعثرك فى التفكير..نايم وفى امان الله...واخدلى بالك انتا فى امان الله دى...واذ حلمت بان ربنا جالى وانا نايم....هبااااااااا انتا بتتكلم جد؟؟....قولنا خيالية...متفكرش كتير...

صحانى من عز النوم اللى انا فيه وقالى..اشرف...اصحى يااشرف...ضرورى اتكلم معاك دلوقتى...صحيت بقى ماهو دة المسيح برضة يعنى هو انا بشوفه كام مرة... بس الغريب.... الغريب انى مش متفاجأ انه المسيح...وانى بكلمه كدة عادى.... فيس تو فيس...المهم قولتله...ببرود قوى...وبتاوب وبوقى مفتوح قوى...خير يارب فى حاجة؟؟...كنت عاوز اقولك على حاجة هتحصل بكرة اول لما تصحى من النوم...طب مكنا نأجلها لما اصحى يارب...قالى لا دة ضرورى تعرفها دلوقت...خلاص منا كدة كدة صحيت بقى قول ماشى بس مطولش قوى عليا عشان لسه عاوز انام....وراح قالى المفاجأة....انا النهاردة اخر يوم ليا ابقى فيه ربنا ومن بكرة مافيش اله !!!!!!!!!!!!!!....

دعكت ودنى بنفس الايد اللى دعكت عينى...معلش يا رب انتا عارف بقى لسه صاحى من النوم والواحد بيتهياله حاجات كدة...انتا قولت اية تانى كدة؟؟...وعاد الرب كلامه...

انتا بتتكلم جد ولا اية.....يعنى انتا بكرة مش هتبقى اله.....طب استنى افكر كدة...

دة انا كل يوم بصحى بالفطرة كدة مين هيصحينى بكرة منتا بتاع الفطرة منتا اللى بتصحينى عشان اروح الكليه ولا اية؟...اظبط المنبة على موبايلك وهيصحيك...طب يارب مين هيطلع الشمس طيب ويطلع القمر يعنى احنا مين هيظبطلنا النظام بتاع الكون؟؟منا يعنى هروح الكليه بالليل..انا موصى الشمس تتطلع فى ميعادها والقمر فى ميعاده...اممممممم طب ماشى انا المنبة هيصحينى والشمس هتتطلع وهروح الشغل هنزل ازاى انا من بيتى منتا عارف اللى فيها فى كلاب فى الشارع بتاعى وانا بخاف منهم...كل واحد وليه ضعفاته.... وكل مرة بقول عديها يارب على خير والكلاب متعملش حاجة...دلوقت بقى انا مين هيخللى الكلاب متعملش حاجة؟؟...انا موصى عليك متقلقش...طب يارب الكلاب وساكتة والمنبة هيصحينى والشمس طالعة وكله قشطة...انتا عارف بقى اللى فيها اكتر...الدكتورفي الكليه (...........) مطلع عين اهل...اة معلش معلش هشتم وانتا موجود برضة ميصحش..(............) دة مين هيتصرفلى معاه طب موتوهلى طيب خليه يحبنى قبل انتا متسيب الموضوع ولا اية النظام طيب...لا لا ممينفعش العملية كدة تمشى ازاى....

لا واستنى دة كمان فى الجواز انتا عارف انى بحب( ...........) من زمان واحنا بنحب بعض مين هيجوزهالى؟؟..يعنى انتا عارف بيتها صعب شويتين...شويتين تلاتة الصراحة وانتا رب قلوب برضة وعارف انى بحبها يعنى امال مين بقى هيسلك الامور؟؟...والواد اخويا بتاع الثانوية العامة انا عاوزه يخش هندسة امال مين اللى هيدخله طيب ولا مين اللى هينور دماغه ويفتح نفسه للمذاكرة؟؟...وامى المريضة دى مين اللى هياخد باله منها طيب بعد كدة انتا عارف انى مشغول فى الشغل وشريهان واخويا....مش فاضى ليها....امال مين هتكل عليه فى الحكاية دى؟؟...وفلوس المشروع مين اللى...والمشكلة اللى مع(..........) صاحبى....والفلوس اللى عليا ل...وجارنا اللى فوقينا اللى متخناق معاه وهو ناوى...الخ الخ...

وانا بحكى لقيت ايد ربنا وجنبه بينزف...حتى رجليه كانت بتنزف..دموعه بتنزل...اتهزيت وبصيت فى عنيه المدمعة...انتا بتعيط ليه يارب؟؟...

قالى انتا لية مقولتش امال مين اللى هحبه بعد كدة؟؟؟...

لية مقولتش مين اللى هكلمه واصليله بعد كدة؟؟...لية مقولتش مين هيبقى ابويا بعد كدة؟؟امال انا هبقى ابن مين بعد كدة؟؟امال مين اللى هيفتحلى بيته طول الوقت بعد كدة؟؟؟...لية اللى بينا يبقى احتياجات منك فيا انا بديهالك لكن انتا اية بتدهونى...تفتكر انا ناقصنى حاجة؟؟...انا الكامل انا ليا اللى يسبحنى ويرنملى...لو عاوز اخلق اولاد من الحجر ويحبونى اقول كن فيكون...انا رديت عليك بكل اللى طلبته وهعمهولك لو كان للخير ليك بس لو دة بس اللى بينا يبقى انتا اصلا عايش من غير حب حقيقى وانا اسمى الله محبة...يبقى انتا عايش من غير اله برغم انى موجود وهفضل للابد موجود بس انتا؟؟؟؟؟؟؟؟

انا اسف يارب قوى انا مقصدتش اخترع ولا اقول كلام زى دة لمجرد انى اكتب قصة والسلام...لكن انا حسيت انى بتاع مصلحتى معاك وان الحب الحقيقى فيا بيموت بيموت زى منا شايف فى كتير حواليا عايشين كأننا بلا اله...بلا اب...بلا حب...عايشين بفكر مصباح علاء الدين للاسف .

مع بساطه كلماتها لكن بجد معبره جدا

مشكوره لاختيارك رينه

الرب يباركك

انا اسف يارب قوى انا مقصدتش اخترع ولا اقول كلام زى دة لمجرد انى اكتب قصة والسلام...لكن انا حسيت انى بتاع مصلحتى معاك وان الحب الحقيقى فيا بيموت بيموت زى منا شايف فى كتير حواليا عايشين كأننا بلا اله...بلا اب...بلا حب...عايشين بفكر مصباح علاء الدين للاسف .

كلمات جميله وتعليق رائع اخر العبرة
جزيل الشكر لكِ مديرتنا

رووووووووووووعه بجد
ميرسي كتيييييييييييييير حببتي
ربنا يباركك