أبدا مابيبقاش العيد

يوسف: (يجلس بمفرده) بكرة أجازة أحسن برضه يعني هو الواحد عايز

إيه من المدرسة؟ خلينا ننام براحتنا ونسهر زي ما إحنا عايزين !!

(يتمشى) أجازة عشان العيد ... إيه يعني عيد ؟؟

أحسن حاجة في العيد إنه الواحد بياخد أجازة بس !!

يعني إيه عيد من غير لبس جديد على مزاجي !! مش بابا وماما

يشتروه ويجبهولي ؟؟ هاا !!

يعني إيه عيد من غير عيدية؟ ولعبة وهدية ... بس ليا ؟؟ هاا !!

قال عيد قال... ولو جيت قلت لبابا عايز فلوس هيقوللي :

( يقلد باباه ) يا يوسف يا حبيبي ... إنت عارف إن مش معايا فلوس

كتير .. كفاية إننا جبنا لبس العيد ، لما ربنا يبعتلنا فلوس تاني أكيد

هاجيبلك هدية

(بتريأة) آآآآه بقى لما ربنا يبعت



(تدخل الأم في هذه اللحظة)



الأم : بتبرطم لوحدك بتقول إيه يا يوسف ؟؟؟



يوسف : أبدا ... ولا حاجة !



الأم: عيب يا يوسف ، لما أسألك تجاوب كويس



يوسف: أصل يا ماما بصراحة أنا مش شايف معنى للعيد من غير ما أجيب

كل حاجة على مزاجي وزي ما أنا عايز

من حقي أجيب اللبس على مزاجي وأخد عيدية عشان أجيب

الهدية اللي تعجبني



الأم : ياااااه يا يوسف كل حاجة عشانك انت بس ؟ ده انت فاهم العيد غلط

خالص! بس على العموم مسيرك هتفهم يعني إيه عيد

وبمناسبة العيدية يا يوسف ... بابا الصبح سابلك الظرف ده

وبيقولك كل سنة وانت طيب



يوسف: وهو فين بابا؟



الأم: راح يشتريلنا شوية حاجات ... أنا داخلة المطبخ بقى اشوف اللي

ورايا



يوسف: لما أشوف الظرف ده فيه إيه !

إيه ده ... فلوس هيه هيه هيه ... بابا إداني عيدية ... يا فرحتي يا

فرحتي

أيوة كده هاجيب اللعبة اللي أنا عايزها



الراوي : وبعد أيام في المدرسة وفي وقت الفسحة ...



فادي : يوسف يوسف



يوسف: فادي إزيك



فادي: إزيك إنت يا يوسف عامل إيه؟



يوسف: أنا تمام ... كان حتة عيد يا فادي أنا اتبسطت فيه أوي



فادي: طب حلو خالص ... يوسف ... أنا كنت عايزك في موضوع



يوسف: قول



فادي: عارف كريم صاحبنا ؟



يوسف: أه ماله؟



فادي: إنت عارف إن ظروفه كانت صعبة الأيام اللي فاتت دي ؟



يوسف: أه عشان مامته كانت عيانة



فادي: مش بس كده ... دي قعدت اسبوع في المستشفى و باباه صرف

كل فلوسه على علاجها



يوسف : وبعدين؟



فادي: وبعدين كريم السنة دي مجبش لبس العيد ولا حتى أخد عيدية



يوسف: وإنت عرفت كل ده إزاي؟



فادي : إنت ناسي إني أناوكريم أصحاب من زمان وهو بيحكيلي على كل

اللي بيحصله



يوسف : آآآآآآه ... طيب ربنا يخليكوا لبعض



فادي: يوسف ده مش وقت هزار



يوسف: طب إيه يعني يا فادي ؟ أنا مش عارف أنا مالي بالموضوع ده؟



فادي: ما أنا هاقولك أهو ... أنا ورامي وساندرا و إيمان ومينا إتفقنا نجيبله

هدية وعايزيناك تشترك معانا



يوسف: باقولك إيه ... أنا مش هاقدر أخد فلوس من بابا عشان أجيب هدايا

لحد !



فادي : مين قال إنك هتاخد فلوس من باباك ؟ إحنا هناخد جزء من فلوسنا

ونحطها على بعض و نجيبله هدية



يوسف : يا سلاااااااام !!!! أخد من فلوسي ؟؟؟ العيدية بتاعتي عشان

أجيب هدايا ؟؟؟ مين قال كده ؟ دي فلوسي أنا !!!

أنا إللي من حقي أخد في العيد مش أدّي ... شايفني غني أوي

عشان أديك من فلوسي؟



فادي: فيه إيه يا يوسف؟



يوسف: فيه إنه لما أكبر وأبقى غني ساعتها هاقدر أساعد إللي حواليا ...

لكن دلوقتي فلوسي على أدّي



فادي: واضح إنك فاهم العيد غلط يا يوسف



يوسف: إنت كمان هتقول نفس الكلام إللي ماما قالته !



فادي: أيوه يا يوسف ... ده عيد إيه؟



يوسف : عيد قيامة الرب يسوع طبعا ... إيه السؤال ده؟



فادي: بالظبط الرب يسوع مكانه في السما في بيت الآب والملايكة

بتخدمه ...لكنه قرر إنه ينزل على الأرض ويبقى واحد زينا ...و رضي بالصليب علشاننا...علشان كل اللي يؤمن بية..ياخد حياة أبدية ...



يوسف: و قيامته؟؟؟؟؟؟



فادي: تمام يا يوسف....علشان ناخد الحياة الجديدة دي كان لازم يقوم من الموت...



يوسف: أنا مش فاهم... مال قصة الفداء بكريم و العيد؟؟؟



فادي : يعني لو كان الرب يسوع أناني ... كان قال وأنا مالي ، خللي كل

الناس تروح النار و أنا مش هاموت عشان حد ... الناس غلطت

خلليها تتحمل نتيجة غلطتها...كنا ساعتها كلنا كنا حنروح فيييييين؟





يوسف: النار طبعا ... ياااه أشكرك يا رب إنك مفكرتش في نفسك و فكرت

فيا



فادي : شفت إنت مبسوط إزاي إن الرب يسوع فكر فينا ... مفكرش في الألم اللي حيتعرض ليه وجه على الأرض وإتحمل عداوة ناس كتير ووصل للصليب علشانا



يوسف: طبعا مبسوط يا فادي



فادي : بس واضح إنك ماتعلمتش حاجة من العيد ده!



يوسف: ليه يعني؟؟؟



فادي: لأنك أناني يا يوسف ... بتفكر في نفسك بس وشايف إن كل حاجة

من حقك ... طبعا من حقك تتبسط وتلبس وتلعب بس ده يخليك

تفكر في غيرك كمان علشان زي ما أنت مبسوط تفرح غيرك

كمان ... لأن غيرك كمان من حقه يتبسط



يوسف: معاك حق يا فادي ... أنا كنت اللي بافكر فيه نفسي وبس ...

فادي أنا هاشترك معاكم



فادي : أنا كنت عارف يا يوسف إنك مش هتكون أناني ... خلاص هاعدي

عليك إنهاردة ونروح نشتري الهدية لكريم ونروح نزوره



يوسف : وأنا موافق



فادي: طيب أنا هاروح بقى أكلم باقي المجموعة ... سلام



يوسف : سلام ربنا معاك



الراوي: وبعد مارجع يوسف البيت



يوسف : ماما يا ماما



الأم: أيوه يا يوسف



يوسف : أنا عرفت بس إنهاردة يعني إيه عيد



الأم: أنا كنت عارفة يا حبيبي إنك أكيد هاتعرف

هافكرك بآية في الكتاب المقدس بتقول كده :







" بهذا يعرف الجميع أنكم تلاميذي : إن كان لكم حب بعضا لبعض"

يوحنا 13 : 35



الختام : ترنيمة أبدا مابيبقاش العيد

حلو ماروووووووووو
ميرسي كتير
ربنا يباركك

جميل يا مارو

شكراااااا على الموضوع الرائع

ربنا يبارك حياتك

ميرسي يا رجاء يا قمر

روعة
ميرسي كتير
ربنا يعوضك

شكرا يا ادمن لمرورك العطر
نورت الموضوع